Վիշապի կոթողներ. Քաղաքապետարանը հանգստացնում է, վարչական շրջանը` ցավակցում

Կրկին հասարակության ուշադրությունը քաղաքի այգիներն են, այս անգամ` Գայի 31 շենքի հարևանությամբ գտնվող Վիշապի կոթողներ այգու «ճակատագիրը». մոտ երկու հազար քառակուսի մետր տարածք մեկ գիշերվա մեջ ցանկապատվել է ալյումինե պատնեշներով, հանվել են տեղում գտնվող նստարաններն ու սկսել են ծառերի հատումը` տեղում, ըստ բնակիչների, կառուցվելու է 18 հարկանի բարձրահարկ շենք:

«Այգու հարևանությամբ գտնվող հողամասը, որը այգու հետ առհասարակ որևէ առնչություն չունի, տարիներ շարունակ անձի սեփականություն է ու կառուցապատման համար նախատեսված հատված է: Այգին առանձին հատված է: Հավատացնում եմ, որ ոչ մի ծառ չի հատվել, կարող եք լինել տեղում ու համոզվել»,- Panorama.am-ի թղթակից հետ զրույցում ասաց Երևանի քաղաքապետարանի քաղաքաշինության և հողի վերահսկողության վարչության պետ Հայկ Ասատրյանը:

Մինչդեռ Նոր Նորք վարչական շրջանի աշխատակազմի քաղաքաշինության և հողօգտագործման բաժնի գլխավոր մասնագետ Արմեն Հովհաննիսյանը նախօրեին մեզ հետ զրույցում ասաց, որ օրեր առաջ Վիշապի կոթողներ այգու հարկից շենքների բնակիչները եկել էին վարչական շրջանի ղեկավարի մոտ, «բայց քանի որ մեր կոմպետենցիայի մեջ չէ, ցավակցում ենք, որ անտառը պետք է կտրեն» (շինթույլտվություն քաղաքապետրանն է տալիս ու իրենց միայն ներկայացնում են փաստաթղթեր, որ այդ տարածքում նման շինություն է կառուցվելու):

«Չունենք փաստաթուղթ. ինչ է կառուցվելու` ժողովրդից գիտենք: Շրջափակել են արդեն մետաղական խողովակներով: Դեռ ծառեր չեն հատվել»,- ասաց քաղաքաշինության և հողօգտագործման բաժնի գլխավոր մասնագետը:

«Կան քաղաքաշինական փաստաթղթեր, հաստատված նախագիծը` իր անցած փորձաքննություններով, բազմաբնակարան շենք կառուցելու համար շինարարության թույլտվությունը: Վարչական շրջանում եթե չունեն տեղեկություն, բան չի` միանշանակ փաստաթղթերը առկա են: Այս պահին շինարարական հրապարակի սահմանազատման աշխատանքներն արդեն ավարտված են, հավանաբար հողային որոշակի աշխատանքներ կսկսվեն, իրազեկող ցուցանակը առաջիկա 1-2 օրում փակցված կլինի»,- նշեց քաղաքապետարանի պաշտոնյա Հայկ Ասատրյանը` ապա հավելեց. «Կարող եմ ձեզ հավաստիացնել, որ բնակիչների մտավախությունը, թե շենքի կառուցումը կվնասի այգին, այգու տարածքը կարող է հետագայում նույնպես կառուցապատման տարածք դառնալ, անհանգստություններ են, որոնք չունեն ոչ մի հիմնավորում»:

Աղբյուր` Panorama.am